கோவில் மணியோசையிலே !

கோவில் மணியோசையிலே மீனாட்சி ;

        கொஞ்சு மொழி கேட்குதம்மா மீனாட்சி !

கொஞ்சுங் கிளிப் பேச்சொலியும் மீனாட்சி ;

        குழல்போலே யொலிக்குதம்மா மீனாட்சி !

                                          ( கோவில்மணி )

காலமெலாம் காலடியிற் மீனாட்சி ;

        கருணைக்கே காத்திருந்தோம் மீனாட்சி !

பாவமெலாம் போக்கிடுவாய் மீனாட்சி ;

        பதம் பணிந்தோ மருள்வாயே மீனாட்சி !

ஞாலமெலாம் உன்புகழை மீனாட்சி ;

        யாம் பரப்ப,தயைபுரிவாய் மீனாட்சி !

நாலும் வரும் வாழ்க்கையிலே மீனாட்சி ;

        நல்லதையே நடத்திடுவாய் மீனாட்சி !

                                          ( கோவில்மணி )

அருளன்பு அத்தனையும் மீனாட்சி ;

        அளிப்பவளே,அம்மையே மீனாட்சி !

இருள் நீக்கும் மதிமுகமே மீனாட்சி ;

        இணையிலா,உன்முகமே மீனாட்சி !

பொருள்மிக்க,சுவைமிக்க மீனாட்சி ;

        புதுக்கவிதை யெழுதிடவே மீனாட்சி !

அருள்தந்து,கரங்கொண்டு மீனாட்சி ;

        ஆட்கொண்டு,அன்பு செய்க மீனாட்சி !

                                         ( கோவில்மணி )